شقتى الجديدة بقلم الكاتبه امانى سيد

التسليم لأخوه، وسمعت صوت ضحكهم فوق واصل لعندي.. ضحك رامي وهو بيشكر أخوه السند.
قعدت وسط الشنط، وابني الصغير بيبص لي بذهول ويقولي ماما، هو إحنا ليه مش هندخل الشقة الجميلة اللي فيها الأوضة بتاعتي اللي شفتها في الصور؟قصص وروايات أمانى سيد 
مسحت دموعي بسرعة وقلت له معلش يا حبيبي، أصل بابا عايزنا نقعد هنا شوية.. بس أوعدك إن حقنا مش هيضيع.
فتحت الشنطة، وطلعت منها اللاب توب بتاعي، والملف اللي كنت دايماً شايلاه في سري. أنا كنت محوشة كل التحويلات البنكية اللي كنت ببعتها من الغربة، وكل فواتير العفش اللي اشتريتها بكريديت كارد بإسمي، وصور العقد اللي هادي وقعه هناك في السفارة والتوكيل اللي كان معمول بحدود معينة.
فجأة الباب خبط، لقيت رامي داخل بكل بجاحة ومعاه قائمة وقلم، وقال لي
معلش يا أبلة منار، هادي قالي إنك معاكي فواتير العفش اللي فوق، محتاجها بس عشان حمايا يشوفها ويحطها في القايمة بتاعة خطيبتي عشان يضمنوا حقها، إنتي عارفة بقى الأصول!
بصيت له من فوق لتحت وقلت له بابتسامة صفرا
أصول؟ إنت بتعرف في الأصول يا رامي؟ الفواتير دي ملكي، ومكتوب فيها إني أنا اللي شارية، عايز تحطها في قايمة عروستك بصفتها إيه؟ هدية من مرات أخوك؟
ارتبك وقال لا.. هادي قالي إننا هنقول إنها هدية منه هو.
رديت عليه ببرود
طب قول ل هادي إن الفواتير دي مش هتطلع من الشنطة دي، ولو عايز يضمن حق عروستك، يروح يشتري لها عفش من ماله الخاص، مش من شقايا.. ويلا يا حبيبي اطلع كمل فرشك، عشان لسه اللي جاي تقيل.
خرج رامي وهو بيبرطم، وأنا مسكت الموبايل وكلمت المحامي بتاعي اللي كنت مرتبة معاه من قبل ما ننزل، وقلت له كلمة واحدة
نفذ يا متر.. هادي سلم المفاتيح رسمياً، والصور والفيديوهات وصلتني، ابدأ في إجراءات الحجز والتمكين فوراً.
الخطة بدأت تتحرك، وأنا قاعدة في الشقة القديمة وسط التراب، بس قلبي كان بارد زي الثلج. هادي نزل لي بعد شوية، وشه كان محقن، وشكله ناوي على خناقة عشان كسفت أخوه قدام خطيبته.
دخل وضرب الباب برجله وقال بصوت عالي
إنتي إيه اللي عملتيه مع رامي فوق ده؟ بقى رامي ينزل مكسوف ويقولي أبلة منار مش راضية تديني الفواتير؟ إنتي عايزة تصغريني قدام نسايب أخويا؟ الفواتير دي تلزمني دلوقتي حالا يا منار!
قمت وقفت قدامه بكل هدوء، وربعت إيدي وقلت له
الفواتير دي مش هتطلع يا هادي، لأن الفواتير دي هي صك ملكيتي لكل مسمار فوق. إنت عايز تاخد شقايا تفرش بيه شقة لأخوك، وكمان عايز تخليه يكتبه في قايمة مراته؟ يعني أنا أدفع، وهي تملك؟ إنت اتجننت يا هادي؟ الغربة لحست مخك؟
قرب مني بغضب وقال الشقة دي باسمي، والعفش ده أنا اللي منقيه، والفلوس اللي اتدفعت فيها إحنا كنا شغالين سوا، يعني مفيش فرق بيني وبينك.. هاتي الفواتير بدل ما أمد إيدي عليكي!
ضحكت بمرارة وقلت له
تمد إيدك؟ جرب يا هادي.. جرب عشان المحضر اللي هييجي بكره يلاقي تهمة ضرب كمان مع تهمة التبديد. الفلوس اللي اتدفعت في الشقة دي محولة من حسابي الشخصي في الغربة لحسابك هنا في مصر بصفتي موكلة ليك لتأسيس مسكن الزوجية.. مش هدية لأخوك الضايع.
اللون هرب من وشه لما سمع كلمة توكيل ومحضر. زعق فيا إنتي بتهددي جوزك يا منار؟ عايزة تخربي البيت عشان خاطر حتة شقة؟
رديت عليه بقوة
إنت اللي خربته لما فضلت أخوك الصايع على مراتك وابنك. إنت اللي خربته لما استخسرت فيا الفرح والسفر واديته لرامي على طبق فضة من فلوسي. من اللحظة دي، مفيش هادي ومنار.. في حق وباطل. والشقة دي هترجع لي، وبالقانون يا هادي.
سبته واقف مبهور من قوتي ودخلت الأوضة وقفت على ابني. ومن ورا الباب سمعته وهو بيكلم رامي في التليفون وصوته بيترعش
الحقني يا رامي، منار شكلها ناوية على شر.. البت دي مأمنة نفسها وممكن تطلعنا من الشقة في أي لحظة.
سمعت صوت رامي وهو بيرد عليه بزعيق واصل لعندي
تطلع مين يا عم؟ إنت خفت منها ولا إيه؟ الشقة باسمك والعقد في جيبنا، خلّيها تخبط راسها في الحيط.. الفرح بكره، والزفة هتدخل الشقة دي يعني هتدخل!
ابتسمت وأنا بكلم المحامي في سري يا ريت يدخلوا الزفة يا رامي.. عشان الفضيحة تبقى بجلاجل
يوم الزفة، الشارع كله كان مقلوب، صوت المزيكا والعربيات واصل لحد عندي وأنا قاعدة في الصالون بتاعي اللي هادي كان فاكر إنه وهبه لأخوه. كنت لابسة فستان شيك، وحاطة ميكب هادي، وقاعدة بكل ثقة وجنبي بابا وأخواتي الرجالة، والبيت كله ريحته بخور ونضافة.
فجأة، سمعت صوت الزغاريد طالعة على السلم، وصوت رامي وهو بيضحك وبيهزر مع عروسته نهى وأصحابه. المفتاح دخل في الكالون، والباب اتفتح.. ودخلت الزفة.
أول ما رامي شافني قاعدة، الضحكة اختفت من وشه، والعروسة برقت بذهول وهي شايفة ناس قاعدة في شقتها. هادي كان وراهم، وأول ما شاف بابا وإخواتي، وشه جاب ألوان ووقف مكانه كأنه اتشل.
رامي صرخ بذهول إيه ده؟ أنتم بتعملوا إيه هنا؟ وإزاي دخلتم الشقة دي؟
قمت وقفت بكل هدوء، وشاورت له على الباب وقلت له
أهلاً يا عريس.. مبروك الزواج. بس معلش، العنوان غلط. الشقة دي شقتي أنا، وبالقانون وبالأوراق، وبابا وإخواتي منورين بيت بنتم.. إنت بقى