أمانى سيد
شقتى الجديدة بقلم الكاتبه امانى سيد
انا وجوزى شغالين فى احدى الدول العربية ومرتبنا كويس الحمد لله اشترينا شقه كبيره وفرشناها عشان لما ننزل البلد بتاعتنا تكون جاهزه للسكن
لكن يوم مانزلت اتفاجئت إن جوزى أدى الشقه لاخوه هديه وطلب منى اننا نقعد فى شقتنا القديمه
أنا منار، اللي قضيت سنين الغربة بنحت في الصخر، كنت بوفر القرش على القرش كامله على صفحتى قصص وروايات أمانى سيد ، وبحرم نفسي من رفاهيات كتير عشان نأسس شقة العمر.
يوم ما نزلنا مصر، كنت طايرة من الفرحة، شايلة في إيدي مفتاح الشقة الجديدة اللي اخترت كل ركن فيها بالصور والرسائل. تخيلت نفسي بفتح الباب وبشم ريحة العفش الجديد، وبقول أخيراً ارتحنا.
لكن قدام باب العمارة، هادي وقفني، ملامحه كانت مهزوزة ومبيحطش عينه في عيني. طلع مفتاح قديم، مفتاح شقتنا القديمة اللي في الدور الأرضي، اللي كانت ضيقة ومكتومة.
قلت له باستغراب أنت بتعمل إيه يا هادي؟ الشقة الجديدة في الدور الخامس، أنت نسيت ولا إيه؟
رد عليا ببرود مصطنع وهو بيبص في الأرض
لا منسيتش يا منار.. بس بصراحة، رامي أخويا خطب، وظروفه صعبة جداً، وأنتِ عارفة إن الشقة اللي كان هيأجرها راحت عليه. أنا فكرت إننا أهل ومينفعش أسيبه في زنقة زي دي.. أنا كتبت له عقد
الدم غلي في عروقي، الدنيا لفت بيا وأنا شايفة تعب سنين الغربة بيتقدم على طبق من ذهب ل رامي، اللي طول عمره عايش على قفانا.
قلت له وصوتي بيترعش من القهر
هدية؟ شقة العمر اللي دافعة فيها نص تمنها من شقايا في الغربة تديها لأخوك هدية؟ ومن غير ما تاخد رأيي؟ جروبى الكاتبه امانى سيد أنت بتوزع ورث أبوك يا هادي ولا بتوزع شقاي؟
لقيت رامي طالع من مدخل العمارة، بابتسامة مستفزة، وماسك في إيده خطيبته وهو بيقول
منورة يا أبلوة منار، حمد الله على السلامة.. معلش بقى هنتعبكم معانا، بس هادي طول عمره قلبه كبير وعارف إن ماليش غيره. الشقة بجد ذوقك فيها يجنن، تسلم إيدك.
بصيت ل هادي اللي كان واقف زي التلميذ الخايب ورا أخوه، وبصيت ل رامي اللي داخل ملك في ملكي أنا.. وحسيت إن الغربة المرة دي مش هتبقى برا البلد، الغربة هتبقى جوه البيت ده.
بصيت ل هادي بذهول، كنت حاسة إن الكلام اللي بيسمعه ودني ده مش ممكن يكون طالع من الراجل اللي شاركته الحلوة والمرة. سألته بصوت مخنوق بالدموع، وكأني بستنجد ببقايا عقله
أنت بتقول إيه يا هادي؟ تدي له شقتنا الجديدة بكل العفش
هنا ظهرت بجاحة هادي الحقيقية، عدل قميصه ورد عليا ببرود يستفز الحجر
أدي له القديمة إزاي يا منار؟ إنتي مش شايفة حالتها؟ دي محتاجة توضيب بمبلغ وقدره، وماتليقش بعرسان في أول حياتهم. وبعدين رامي أولى بالفلوس اللي كان هيوضب بيها، هياخد عروسته ويسافروا يقضوا شهر عسل محترم ويعملوا فرح يفرحوا بيه.. مش لازم نكتم على نفسهم من أولها.
الكلمة نزلت عليا زي الصاعقة. يعملوا فرح؟ يسافروا يتفسحوا؟
ضحكت بمرارة وصوتي علي غصب عني
فرح؟ وشهر عسل؟ وأنت عملت لي إيه يا هادي؟ أنا اللي اتجوزتك في أوضة وصالة، ولا شوفت فرح ولا سافرت حتة، وخدتني على الغربة من تاني يوم عشان نكِدّ ونشقى ونعمل قرش ينفعنا! دلوقتي شقاي أنا وتوفيقي في الغربة يروح ل رامي عشان يتفسح ويصيف، وأنا أرجع أسكن في الشقة اللي ماتليقش بعرسان؟
بص لي بضيق وكأني أنا اللي غلطانة وقال
يا ستي ده أخويا الصغير، وبعدين إنتي خلاص كبرتي على الكلام ده، إحنا دلوقتي بندور على الستر. متبقيش أنانية وتوقفي حال الواد عشان شوية حيطان.
في اللحظة دي بصيت ل رامي اللي كان واقف يبتسم بانتصار
قلت له بكلمات طالعة من وسط وجعي
أنانية؟ أنا اللي وفرت من أكلي وشربي في الغربة عشان أجيب طقم الصالون اللي عروسته قاعدة عليه دلوقتي أبقى أنانية؟ والباشا أخوك اللي مبيعرفش يصحى قبل الضهر وعايز ياخد شقى عمري على الجاهز عشان يتفسح بفلوس توضيب الشقة.. ده يبقى إيه؟ ده يبقى ابن أصول؟
رامي بطل يبتسم وبدأ يمثل الزعل وقال خلاص يا هادي، لو مدام منار هتقعد تمنّ علينا بالشقة، أنا ممكن أمشي.. أنا مش حمل ذل.
طبعاً هادي اتهز، وصرخ فيا عاجبك كدة؟ كسرتِ بخاطر أخويا؟ اطلعي يا منار على الشقة القديمة، ورجلك فوق رقبتك، والشنط دي مش هتدخل الشقة هنا.. الشقة دي خلاص بقت شقة رامي.
وقفت مكاني، وبدل ما أعيط، حسيت ببرود غريب سكن قلبي. بصيت ل هادي وقلت له بهدوء مرعب
ماشي يا هادي.. اعتبرني وافقت. هطلع الشقة القديمة، وهسيب رامي وعروسته يتهنوا ب مالي. بس افتكر كويس، إن اللي بيبني سعادته على قهر غيره، مبيتهناش.
طلعت الشقة القديمة وأنا حاسة بضيق تنفس، الريحة تراب، والحيطان مقشرة، والعفش اللي فيها كأنه بيعيط على حالي.
