البديله

نهلة الأوضة اللي كانت محرمة عليها. ريحة داليا كانت في كل حتة برفيوم قديم هدوم مرصوصة بعناية وصور مالية الحيطان. نهلة وقفت قدام مراية داليا وبصت لوشها.. بدأت تدقق في ملامحها فعلا أنا شبهها ولا هو اللي رسم الملامح دي عليا بالخداع.
مسكت علبة مكياج كانت مركونة ورمتها في المراية بكل قوتها وهي بتصرخ أنا نهلة! أنا مش داليا! أنا مش جثة لست لسه عايشة!.
ياسر دخل على صوت التكسير وبدل ما يطبطب عليها مسكها من دراعها بقوة ولواها ورا ضهرها المراية دي داليا كانت بتحب تبص فيها.. إنت كسرتي إيه يا مجنونة والله لو لمستي حاجة تانية تخصها لأرميكي في الشارع بقميص نومك!
يوم وصول داليا
البيت كله كان في حالة طوارئ. داليا وصلت دخلت البيت وهي لابسة طقم براند وشعرها متسرح بنفس الطريقة اللي ياسر كان بيجبر نهلة تعملها. الصدمة كانت إن داليا أول ما شافت نهلة مالت على ياسر وضحكت بدلع برافو يا ياسر.. ذوقك لسه متغيرش فعلا عرفت تنقي عروسة حلاوة شبهي بالظبط.. بس يا خسارة الروح مابتتقلدش.
ياسر كان واقف مبهور عينه مش نازلة من على داليا ونهلة واقفة شايلة شنط داليا زي الخدامة. حماتها قالت بصوت عالي يلا يا نهلة خدي الشنط دخليها أوضة داليا وجهزي الغدا داليا جاية من سفر وتعبانة.
على الغدا داليا كانت قاعدة في نص الترابيزة وياسر جنبها ونهلة بتلف عليهم بالأطباق. داليا بصت لنهلة بقرف وقالت ياسر هو إنت ملقيتش حد يعلمها إتيكيت تقديم الأكل بجد بيصعبوا عليا الناس اللي بيعيشوا في جلباب غيرهم.
ياسر ضحك وقال معلش يا ديدي بكرة تتعلم منك.. إنت الأصل يا حبيبتي.
نهلة في اللحظة دي سابت طبق الشوربة من إيدها والشوربة وقعت على فستان داليا الغالي. داليا صرخت وياسر قام زي المجنون وضرب نهلة قلم قدامهم كلهم إنت غبية مش واخدة بالك
نهلة حطت إيدها على خدها وبصت لياسر ونظرتها اتغيرت تماما.. مكنتش نظرة انكسار كانت نظرة وداع. بصت لداليا اللي كانت بتنضف فستانها بغل وقالت بصوت هادي وقوي
فعلا يا داليا.. الروح مابتتقلدش.. وعشان كدة أنا هسيبلك الجثة اللي ياسر اتجوزها وهخرج أنا بروحي اللي إنت ولا هو تملكوا تكسروها.
نهلة مشيت بخطوات ثابتة ناحية أوضة داليا اللي كانت محرمة عليها وياسر صرخ وراها رايحة فين يا مجنونة إنت لسه ليكي عين تتحركي
نهلة مردتش دخلت الأوضة وقفلت الباب بالمفتاح من جوه. ياسر قعد يخبط زي المجنون افتحي يا نهلة! والله لو لمستي حاجة داليا لأقتلك!
المفاجأة
بعد دقايق الباب اتفتح. نهلة خرجت وهي شايلة في إيدها علبة قطيفة قديمة كانت داليا مخبياها في وسط لبسها. داليا أول ما شافت العلبة وشها جاب ألوان وجسمها اتنفض وحاولت تهجم على نهلة عشان تاخدها بس نهلة زقتها بقوة ووقفت في نص الصالة.
نهلة بصت لياسر وقالت بصوت قوي
إنت كنت فاكر إن داليا سابتك وسافرت عشان طموحها ولا عشان الأصل اللي إنت مبهور بيه ده كان أطهر من إنه يعيش هنا
فتحت نهلة العلبة وطلعت منها صور ومكاتيب.. بس مش للياسر
نهلة كملت ب قسوة
داليا جاية يا ياسر مش عشانك داليا جاية عشان تستولى على الشقة دي لأنها عرفت إنك كتبت وصية بكل أملاكك ليها لو جرى لك حاجة.. داليا متجوزة يا أستاذ يا أصل والراجل اللي في الصور ده هو اللي مستنيها بره عشان تقبض التمن!
الانهيار
ياسر مسك الصور إيده كانت بتترعش وهو بيشوف الأصل بص لداليا اللي كانت واقفة زي الفرخة المبلولة وقال بذهول داليا.. الكلام ده صح
داليا حاولت تمثل وتعيط ياسر.. دي صور فوتوشوب دي نهلة بتنتقم مني عشان الشبه..
نهلة قاطعتها بضحكة عالية فوتوشوب طب والورقة دي كمان فوتوشوب وطلعت ورقة تنازل عن الشقة كانت داليا مجهزاها وموقعة عليها تزوير باسم ياسر عشان تخلص كل حاجة في الزيارة دي.
النهاية المنتظرة
نهلة قلعت الدبلة من إيدها ورمتها في وش ياسر وقالتله
المرة دي القلم كان من نصيبك يا ياسر.. القلم اللي فوقك من الوهم اللي كنت عايش فيه. إنت خسرت النسخة اللي حبتك بجد وصانتك وخسرت الأصل اللي كانت بتبيعك وتشتر فيك.. مبروك عليك الوهم ومبروك عليا حريتي.
نهلة لمت هدومها في شنطة واحدة وخرجت من البيت وهي رافعة راسها. ياسر كان واقع على الأرض بيبكي زي الطفل وداليا كانت بتلم حاجتها بسرعة عشان تهرب قبل ما البوليس يجي وحماتها وسلايفها واقفين يتفرجوا على الخراب اللي هما كانوا سببه بصمتهم.
نهلة وهي نازلة على السلم بصت للمراية اللي في المدخل وابتسمت لنفسها.. المرة دي شافت نهلة بس ملامحها كانت منورة والروح اللي كانت محبوسة أخيرا طارت.
ياسر مكنش لسه استوعب الصدمة كان بيبص لصور داليا مع الراجل التاني ولورق التنازل المزور وكأنه بيشوف موته بعينيه. داليا حاولت تهرب وتجري على الباب بس ياسر قام زي المجنون ومسكها من شعرها اللي كان بيعشقه وصرخ بصوت زلزل البيت
كنتي بتبيعي فيا لمين يا داليا ده أنا بنيت ليكي معبد في قلبي وذليت مراتي وكسرتها عشان ملمح منك! تطلعي متجوزة وبترتبي لقتلي وسرقتي
داليا في اللحظة دي قلعت قناع الرقة وبصت له بمنتهى الجحود وقالتله
أيوة.. ومكنتش طايقة لمسة إيدك كنت بقرف منك ومن ضعفك ومرضك بيا.. أنا متجوزة راجل بجد مش خيال زيك عايش على صور قديمة.. إنت اللي غبي يا ياسر إنت اللي حطيت رقبتك تحت سكيني فماتعيطش دلوقتي!
النهاية السوداء لياسر وداليا
ياسر من كتر الصدمة والغل محملش قلبه الوجع.. وقع في الأرض مشلول الحركة تماما جلطة مفاجئة من كتر القهر شلت نص جسمه ولسانه. داليا حاولت تاخد الشنطة وتجري بس نهلة قبل ما تمشي كانت بلغت البوليس ب محاولة تزوير وتشكيل عصابي بالدليل اللي لقيته في العلبة.
البوليس اقتحم البيت وهي بتحاول تهرب واتقبض عليها تلبس بالورق المزور وباسبورات سفر مزورة لها ولجوزها التاني. داليا اتسجنت بتهمة التزوير والابتزاز وخسرت كل مليم كانت بتحاول تسرقه وجوزها الأصل هرب وسابها تواجه مصيرها
لوحدها وطلقها في السجن.
عقاب ياسر
ياسر بقى عايش جثة فوق سرير في أوضة داليا اللي كان بيحبها. بقى محبوس وسط صورها اللي بقت بتفكره ب قذارتها كل ثانية وهو مش قادر حتى يرفع إيده عشان يقطع صورة واحدة منها. حماته وسلايفه اللي كانوا بيشجعوه على ظلم نهلة بقوا هما اللي بيخدموه ب تأفف وقرف وبقوا يرموا له القمة بحساب وبقوا يتمنوا موته عشان يخلصوا من خدمته.
عوض نهلة
أما نهلة فبعد شهور من طلاقها ربنا فتح لها أبواب الرزق. اشتغلت وطورت نفسها وملامحها اللي كانت شبه داليا اتغيرت تماما.. الهم زال من وشها فبقت أجمل بكتير وبقت شخصية قوية وليها كيان.
وفي يوم كانت نهلة ماشية في الشارع وشافت سلوى سلفيتها القديمة كانت ماشية مبهدلة وبتحكي عن حال ياسر والفقر اللي بقوا فيه بعد ما المحامي أخد كل اللي وراهم وقداهم في القضية.
سلوى بصت لنهلة بكسرة وقالتلها سامحينا يا نهلة.. ياسر بيموت في اليوم ميت مرة وداليا بقت عبرة في السجن.
نهلة بصت لها بابتسامة هادية وقالت جملة واحدة
أنا سامحت نفسي إني ضيعت يوم واحد في بيتكم.. أما حق الرحم والقلب اللي اتكسر فربنا هو اللي بيخلصه.. ومبروك عليكم الأصل اللي كنتوا مبهورين بيه.
ركبت نهلة عربيتها وسابتهم ورا ظهرها وهي عارفة إن اللي بيزرع وهم بيحصد سراب واللي بيظلم يتيمة أو غريبة ربنا بيجعل نهايته آية لكل الناس.
تمت.