زوجه على الرف ٢

الست اللي على الرف اللي عمرها ما هتتكلم، ومغلول من الكسرة اللي اتكسرها قدام أهله. بص لأبوه وقال بنبرة مكسورة ومخنوقة اللي تشوفه يا بابا.. أنا مكنتش عامل حساب إن الموضوع هيكبر كدة، وأنا مش عايز بيتي يتخرب ولا عايز أطلق.
وفضلت الليلة كلها كلام، ومحاولات لترتيب الكلام اللي هيقولوه لأبو فرح عشان يرضوه ويرجعوا فرح لبيتها، بعد ما السفرية اتقلبت لأطول ليلة نكد عدت على العيلة كلها.
في اليوم التالي، اتقلبت حسابات إبراهيم وأهله تماماً. من النجمة، صحي إبراهيم وأبوه وأخوه الكبير، والوجوه عليها علامات قلة النوم والنكد المكتوم. ركبوا العربية واتحركوا في اتجاه الشاليه اللي نازلين فيه فرح وأهلها، والكل ساكت، مفيش حد طايق يفتح بؤه بكلمة.
وصلوا قدام الشاليه، ونزل إبراهيم وهو بيبلع ريقه بتوتر، قرب من الباب وخبط مرة واتنين وتلاتة.. ومفيش أي رد. بص من الشبابيك، لقى الأنوار كلها مطفية، والهدوء غريب. سأل حارس المكان، ف قاله ببرود الناس صحيوا من بدري قوي، جهزوا نفسهم وخرجوا كلهم في عربياتهم.
أبو إبراهيم نفخ بضيق وقعد في العربية وقال أهو، الراجل وبنته خرجوا يتفسحوا وعايشين حياتهم، وإحنا اللي واقفين في الشمس زي التلامذة.. مفيش مرواح، هنفضل هنا ومستنيينهم لما يرجعوا، المواجهة دي لازم تخلص النهاردة.
وفعلاً، بدأوا أطول وأسوأ يوم مراقبة في حياتهم
فترة الضهر الشمس كانت حامية، وإبراهيم قاعد في العربية وعينه مش بتفارق بوابة الشاليه، كل ما يشوف عربية جاية من بعيد قلبه يدق ويقول هما، وتطلع مش هما. الغل والندم كانوا بياكلوه وهو شايف نفسه مستني على الرصيف بعد ما كان فاكر إنه سايب فرح على الرف.
فترة العصر الملل والخناق بدأ يشتغل بين إبراهيم وأخوه، والوقت مكنش راضي يعدي، وكل شوية إبراهيم يمسك الموبايل يحاول يتصل ب فرح، يلاقيه مقفول، يتصل ب حماته، تكنسل عليه.. عرف إنهم ممسوحين من حسابات العيلة تماماً في اليوم ده.
وفضلوا على الحال ده لحد ما الشمس غابت، والدنيا ليلت، وبقت الساعة داخلة على عشرة بليل.
وفجأة، ظهرت من بعيد إضاءة عربيات أهل فرح وهي داخلة في الممر. نزلوا كلهم من العربيات، وصوت ضحكهم وهزارهم كان مسمع المكان.. فرح كانت شايلة أكياس ومبسوطة، ومظهر القهر والدموع اللي كانت في عينها امبارح اتمسح تماماً، وحواليها أبوها وإخواتها الصبيان بيضحكوا معاها وكأنهم راجعين من أكبر خروجة وفسحة في حياتهم.
إبراهيم أول ما شاف المنظر ده، دمه حرقه، بس أبوه مسكه من إيده بقوة وقال له بحسم إياك تتهور.. ابلع ريقك وامشي ورايا من سكات. ونزلوا كلهم من العربية واتحركوا في اتجاههم بليل عشان تبدأ مواجهة تانية خالص.