امى

جايبه، وبصيت لإيد أمي وهي بتلفه تاني بعناية واهتمام عمرها ما ورتهوني. في اللحظة دي، حسمت حاجة جوايا كانت بتموت بالبطيء بقالها سنين. الوجع بقا أكبر من العياط، وبقى صمت تام.
ما اتخانقتش، وما زعقتش، ولا حتى سألتها ليه؟. أخدت نفسي وهزيت راسي بهدوء وقررت إن دي هتكون آخر كسرة نفس هقبلها في البيت ده.
من اليوم ده، اتغيرت تماماً. مابقتش البنت اللي بتجري ترضي الكل على حساب كرامتها وصحتها. لما كانت أمي تطلب مني أروح أنظف أو أخدم، كنت برد بكلمة واحدة وبمنتهى البرود تعبانة ومش قادرة. في الأول كانت بتثور وبتتهمني بالأنانية وقلة الأصل، بس النبرة الحادة اللي في عينيها مابقتش تخوفني ولا تخليني أعيط. أنا خلاص اتكسرت بما فيه الكفاية، واللي بيتكسر مابيبقاش عنده حاجة يخاف يخسرها.
ركزت كل طاقتي في تجهيز نفسي وبس. مابقتش أطلب منها حاجة، ولا بقيت أستنى منها كلمة حلوة أو دعوة من قلبها. كنت بشتغل وأشيل قرشي لزمني، وبشتري حاجتي بنفسي باللي يقدرني عليه ربنا. خطيبي كان بيلاحظ سكوتي وبعدي، وبدأ يحس بإن في فجوة كبيرة بيني وبين أهلي، ودا خلاه يحتويني أكتر، ويحاول يعوضني عن الجفاء اللي بشوفه في بيتنا.
وجيه يوم الفرح...
البيت اللي المفروض يكون مليان زغاريط وفرحة لبنتهم اللي بتتجوز، كان عادي جداً، بل بالعكس، أمي كانت مشغولة بإن ابنها ومراته يكونوا في أحسن مظهر، وكأنه فرح أخويا مش فرحي أنا. لما لبست فستاني الأبيض وبصيت لنفسي في المراية، ملقيتش الدموع اللي بتنزل من الفرحة أو من فراق البيت؛ لقيت نظرة قوة ونظرة وداع لرحلة عذاب دامت سنين.
أمي جت باركتلي ببرود، حضنتها حضن خفيف جداً، حضن مجرد من أي مشاعر، لأنه جه متأخر أوي... متأخر لدرجة إنه مابقاش ليه أي قيمة.
يوم ما خرجت من باب البيت ده وركبت العربية جنب جوزي، حسيت إن روحي هي اللي رجعتلي. أخدت نفس عميق لأول مرة من سنين، وكأن الجبل اللي كان كابس على نفسي انزاح.
وقطعت عهد على نفسي أنا مش هكره أمي، بس مش هسمح ليها ولا لأي حد تاني إنه يكسرني أو يقلل مني تاني. هعيش حياتي، هبني بيتي الجديد على الحب، الاحترام، والتقدير اللي اتحرمت منهم. هبعد عن كل مكان وكل شخص بيسببلي أذى نفسي، حتى لو كان الشخص ده هو أقرب الناس ليا بالدم. سيبتلهم البيت، وسيبتلهم الكاسات، وسيبت ورايا الخدامة اللي كانوا فاكرين إنها مالهاش تمن، ومشيت وأنا كلي يقين إن ربنا هيردلي اعتباري في حياتي الجديدة
مرت السنين، وبدأت ملامح حياتي الجديدة تتسم بالفرحة والأمان اللي عمري ما دوقتهم. جوزي كان السند الحقيقي، وأهله بقوا هما أهلي؛ ناس بيعرفوا يعني إيه كلمة طيبة، بيقدروا التعب، وبيشيلوني في عيونهم لو شافوني بس مرهقة.